the picter


o years an years ago
at a roup in whit used tae be
st mary magdalene’s  kirk
(noo the vertical world climbin centre)
I bocht this  pentin
that I still like
a street wi a garij an a big hoose
an in the backgrun
a kirk steeple wi a clock
(10  past 10)
it wis signed d adamson
nae capitals d adamson jist like that

fowk asked
whin they saa it on ma wa
is yon nae thon kirk
jist aff the perth road
next tae the ryehill surgery?
which is whaur I thocht it wis masel
when I bocht it

but it wisnae

in fact it wisnae dundee ataa
or aa thae ither places that wir suggested
it wisnae perth
nor wis it letham
nor kirrie
nor caputh
it wisnae  friockheim
it wisnae crieff

I searched them aa
ilka weekend fir twa/three months
till I began tae think
d adamson hud jist imagined it
pentit it oot o his heid

it’s aye the hinmaist pooch i yir jaiket
whaur ye fin the keys

last friday
I hud tae collect a dug
fae the osnaburg bar in forfar
an ther it wis
ahint the osnaburg
ther it wis
starin me i the face
the vennel wi the big hoose
the garij an the railins
the kirk steeple i the backgrun
an steerin bi a photo o d adamson’s pentin
I fund the very spot whaur he’d stood
(or sat)
a thae years ago
tae pent his picter
ma picter noo

naethin hid chinged
jist the time on the clock.


One response to “the picter

Leave a Reply

Fill in your details below or click an icon to log in: Logo

You are commenting using your account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )


Connecting to %s